الاجازة جت والخناقات ابتدت !!

02:09 - 19 مايو 2023

بقلم .. ديانا مجدى… مافيش بيت فى الدنيا فيه اخوات مش بيتخانقوا ودة مش دليل انهم مش بيحبوا بعض ولا انت ياماما قصرتى فى حاجه.

على قد ما الخناقات مرهقه للام والاب الا انها بتعلم الاولاد كتير جدا من المهارات الحياتية ( حل المشكلات – التفاوض- البحث عن الحلول – واحيانا تقديم بعض التنازلات)

تعالوا اقولكم نعمل ايه وقت الخناقه:
١- عدم التدخل :-
طالما الموضوع مافهوش اى ايذاء سواء بدنى او لفظى ولو حصل ده لازم نفهمهم ان استخدام قوتنا فى الضرب ده شيء غير مقبول ونديهم وقت يهدوا وبعدين نجمعهم نتكلم معاهم بهدوء وندور سوا على حلول.

٢- عدم الانحياز الى احد:-
يعنى الانحياز للاصغر لانه لا يستطيع الدفاع عن نفسه او للاكبر لانه الاعقل واكيد الصغير هو اللى غلط فى حقه ده بيسبب مشكله تانيه وهى الغيرة والرغبه فى الانتقام.

٣- عدم توجيه اللوم لأحدهما فى حاله الاصابه:-
يعنى لو حد حصل اى اصابه اهتم الاول بالاطمئنان عليه وشارك الاخ الآخر فى مساعدة المصاب وبعدين قوله ان اخوك اكيد مكنش يقصد يعمل كدة وهتلاقى بشكل تلقائى هيروح ويعتذر لاخوة لانه اصلا بيكون مخضوض وخايف فى الوقت دة يشعر بتأنيب الضمير.

٤- ماينفعش اقوم بدور القاضي:-
الصح انى اسمع الاتنين واسيب كل واحد يعبر عن مشاعره وافكاره واحاول اوفق الاراء اوصل لراى محايد للطرفين.
افضل كلمه ممكن تقوليها فى وقت الخناقه
ياولاد او ياحبايبي
دلوقتى تحبوا كل واحد يهدى فى مكان ولا تحلوا مشكلتكم مع بعض؟

وإلى اللقاء
فى كبسوله نفسيه وتربويه جديدة
مع الاخصائية النفسيه والتربوية
ديانا مجدى

شارك الموضوع